Inleiding
..."Umdet Tegele ôs leef is" |
|
Tradisie sjteit beej de vastelaovend veurop, maar taevens probeert de vereiniging in te sjpeule op nieje ôntwikkelinge, wat ouch bliek óet ’t greuijend aantal jeugleeje. De vastelaovend is t’r vur jôngk en aad en vuel aktiviteite zien dao den ouch op aafgesjtump.
Vastelaovesgezelsjap D'n Oeles telt ôngeviër 150 aktieve leeje en daonaeve nag en groët aantal meiwerkers en vreejwilligers, die d’r aan meijwerke um ’t sjoëne volksfiës in gôjje bane te leije.
Det wie gezag de jeug heejbeej ein belangriéke plaats innimp getuuge de jôngere-aafdeiling Oeles Toekôms, ‘t Oeles Jeugtrio, de dreej dansgroepe die ôs vereiniging telt en ‘t sjoëlebezeuk.
Maar ouch de aajere waere neet vergaete. Vastelaovesgezelsjap D’n Oeles organizeert jaorliks eine fiësaovend vur gehendikepte en aajere en verzörg of werrek mei aan zittinge in Huize Erkenkamp, Martinushof en vur de Reumapatiëntevereiniging.
Op muzikaal gebied haet de vereiniging in 2001 ôngersjteuning gekraege van de Oeleskèpel 'Tegels Blood'. De Prinsebal is met zién jaorlijks wisselend teema en sjoëne buhne - door eige leeje en vreejwilligers gebouwd – óetgegreuijd toet ein gebeure det de echte vastelaovesveerder besjlis neet wilt misse. De Oeleskrant is ein visitekaertje en ’t hoëgtepunt van de vastelaovend is de sjoëne optoch door de Tegelse sjtraote met prachtigge groepe en wages en ôngeviér 2 a 2500 deilnimmers.
Det dit alles gepaard geit met de nuedigge cente maag duudelik zién. De leeje betale netuurlik kontribusie, maar gelökkig wet Vastelaovesgezelsjap D'n Oeles zich finansjeel gesjteund door de 'Vrinde van 't Oelesriék' die jaorliks ein behuerlikke beejdrage doon. De Sjponsorkemissie ônger ‘t motto 'Umdet Tegele uch en ôs leef is' is t’r in gesjlaag ein behuerlik aantal sjponsors te werve die ein belangriék sjteinke beejdrage um ein en anger in gôjje bane te leije. Ouch de gemeintelikke subsidiej is natuurlik ein belangriéke bron van inkomste.
Vastelaovesgezelsjap D'n Oeles is ein bleuijende, gezônge vereiniging, die same met eur zustervereiniginge De Boereraod oppe Hei en De Kaetelaers op Sjteyl ônger de vlag van 't STV - Samewerkende Tegelse Vastelaovesvereiniginge, de Tegelse vastelaovend kleur guef......en det al viéf en viéftig joar.
